Том Круз 1962 йилнинг 3 июлида АҚШнинг Нью-Йорк штатидаги Сиракуза шаҳри яқинида дунёга келган. У тўрт фарзанднинг ичида учинчиси ва ягона ўқил эди. Унинг онаси актриса, отаси эса муҳандис бўлган.
Том болалигида бўйи паст­лиги учун бироз қийналган ва руҳан эзилган. Шунинг учун у имкон қадар ўзи қатори йигитчалар билан дўст тутинишга ҳа­ракат қиларди. У ҳатто, бў­йини ўстириш учун анча пайтгача спорт билан шуғулланиб юрган. Мактабда ҳам унинг омади чопмади. У онаси каби «дислексия» — ҳарфлар ва текстларни ўқишни қийинлаштирадиган ноёб касаллик билан оғриган ва буни енгиш учун уни махсус касаллар синфига ўтказишган. Бирмунча вақтдан кейин у бу касалликдан қутилади ва одатдаги синф­да ўқий бошлайди.

Том 12 ёшга кирганида уларни отаси ташлаб кетади. Шундан сўнг уларнинг моддий аҳволи бироз оғирлашади ва Том ҳам, унинг уч опаси ҳам мактабдан кейин ишлашга мажбур бўлади.

Қизиғи шундаки, Том кўпинча жангари фильмларда иштирок этган бўлса-да, бир пайт­лар диний семинарияга ҳам қатнаган ва художўй киши бўлишни ният қилган эди. Аммо нимадир сабаб билан у бу ниятидан қайтади ва оддий бир коллежга ўқишга киради. Бу ерда у театр саҳналарида рол ўйнай бошлайди ва ўзининг иқтидори қайси соҳага тегишли эканлигини аниқлаб олади. 1980 йилда у кино ва театр соҳасида машҳур бўлиш ниятида Нью-Йоркка кириб келади. Кўп ўтмай ҳақиқатдан ҳам унинг «Сўнгсиз муҳаббат» фильми машҳур бўлиб кетади.

Аммо унга ҳақиқий шуҳратни «Хавфли тадбиркорлик» фильми келтиради ва шундан сўнг у чинакам Том Круз сифатида танилади.

Унинг асл актёрлик маҳорати эса «Тўртинчи июлда туғилган» драмасида яққол кўзга ташланди. Бу драмада у Вьетнам урушида ҳам руҳан ҳам жисмонан эзилган, хўр­ланган инсоннинг образини қойилмақом қилиб иж­ро этган ва бу роли учун Том «Йилнинг энг яхши ак­тёри» сифатида «Ос­кар»­га тавсия этилади. Аммо бирдан ҳаммаси ўзгариб, бу мукофотни бошқа бир киши илиб кетади.

1990 йилда «Момоқалдироқ кунлари» фильмида у ўзининг бўлғуси рафиқаси — Николь Кидман билан танишади. Унинг олдинги хотини Мими Рожерс билан Круз фарзандсизлик туфайли ажрашишган эди. Николь Кидман ҳам афсуски, Томга фарзанд ҳадя эта олмади, аммо улар бир-бирини шу қадар яхши кўрар эдилар-ки, охир-оқибат болалар уйидан бир қиз — Изабелла Жейн ва Коннора Энтони исм­ли ўғил болаларни олиб, тарбиялайдилар.

Том кичиклигидан Жеймс Бондга ўхшаган мукаммал бир ролни ижро этишни орзу қилиб юрарди. У бу ниятига 1996 йилда эришади. Бу маш­ҳур «Бажариб бўлмайдиган топшириқ» фильм эди. Бу кинони ишлаш дараёнида ҳеч ким унинг муваффақиятига ишонмаган эди. Аммо кутилмаганда фильм нафақат ўзига сарф этилган 120 млн долларни қайтарди, балки жуда катта фойда ҳам келтирди.

Шундан сўнг Том хотини билан Стенли Кубрик режиссёрлигидаги «Юмилган оҳу кўзлар» фильмида биргаликда суратга туша бошлайди. Бу фильм съёмкалари жараёнида Том билан хотинининг ўртасидан «қора мушук ўтади» ва улар турли келишмовчиликларга дуч келишади. Охир-оқибат, кино эфирга узатилади ва шундан сўнг фильм режиссёри оламдан ўтади ҳамда Том Круз билан Никол Кидман расман ажрашганликларини эълон қиладилар.

Худди шу кунларда Том Круз Пенелопа Круз билан ишқий саргузаштлар домига тушиб қолган эди. Оммавий ахборот воситалари бу муҳаббат можароларининг охири тўй билан якунланиши тўғрисида бутун оламга жар солди, ам­мо негадир иш унгача етиб бормади...

2000 йилда «Бажариб бўл­майдиган топшириқ-2» экранларга узатилди. Бу фильм ҳам молиявий жиҳатдан ўзини тўлиқ оқлайди. Кино АҚШнинг ўзида 215 млн., чет элларда эса 330 млн. даромад келтиради.

Аммо Томга бу муваффақиятлар бирибир татимайди, чунки унинг асосий мақсади бир марта ёнига келиб, уни четлаб ўтиб кетган «Оскар» мукофотига сазовор бўлиш эди. У ниҳоясиз умидлар билан «Оскар» мукофотига тавсия этилиши имконияти катта ва ҳакамларнинг муносабати жуда яхши бўлган «Сўнгги Самурай» фильмида ўзининг ажойиб актёрлик маҳоратини ишга солади. Аммо минг афсуски, бу фильм ҳам бирорта номинация бўйича танловга қўйилмайди!

2005 йилда Круз яна бир машҳур режиссёр Стивен Спилберг билан биргаликда «Оламлар уруши» фильмини суратга олади. Худди шу фильм съёмкалари жараёнида у ёшгина актриса Кэти Холмс билан яқиндан танишади. «Оламлар уруши» фильмининг Парижда ўтказилган тақдимоти кунлари Том мана шу ёш актрисага уйланаётганини маълум қилади. Бу маросимни у Эйфель минорасида бўлажак хотинига бриллиант узук совға қилиш билан ўта романтик тарзда нишонлайди. Улар турмуш қурадилар ва бир неча муддат ўтгандан сўнг ажойиб хабар тарқалади — Кэти Холмс ҳомиладор! Ниҳоят, 2006 йилнинг апрелида Том Крузнинг қизчаси — Сури туғилади.